ភ្នំពេញ៖ អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោក ស៊ិន ចាន់សេរីវុត្ថា ទើបត្រូវ បានរំពឹងថាក្នុងឆ្នាំ២០២៣នេះចំនួនអ្នកដំណើរតាមផ្លូវអាកាសនឹងកើនឡើងដល់ជាង ៤,៦លាននាក់ ជាមួយនឹងកំណើនជើងហោះហើរដល់ជិត ៣សែនជើង។
លោក ស៊ិន ចាន់សេរីវុត្ថា ឱ្យ EAC News ដឹងនៅថ្ងៃទី១៣ ខែមករា ឆ្នាំ២០២៣នេះថា ការរំពឹងគឺអាស្រ័យទៅលើការភ្ជាប់ជើងហោះហើរឡើងវិញគដែលពេលមានមានក្រុមហ៊ុនអន្តរជាតិចំនួន២៧ បានភ្ជាប់ការហើរឡើងវិញ គឺស្មើនឹងជិត ៦០% នៃឆ្នាំ២០១៩ (ឆ្នាំដែលមិនទាន់មានកូវីដ) ខណៈដែលមានការរំពឹងទុកថា ផ្លូវហោះហើរ រវាងប្រទេសចិន និងកម្ពុជានឹងអាចឈានទៅជាផ្លូវហោះហើរ នាំមុខគេថ្មីបន្ថែមទៀតផងដែរ។
លោកថា៖ «ជាមួយនឹងការលប់ចោលនូវគោលនយោបាយសូន្យកូវីដ (គ្មានការកំណត់កូតាទៀតឡើយ) យើងរំពឹងទុកថា ជើងហោះហើរ រវាង ចិន និងកម្ពុជា នឹងមានការកើនឡើងជាលំដាប់បន្ទាប់ពីចូលឆ្នាំចិនរួច»។
បើតាមលោក ស៊ិន ចាន់សេរីវុត្ថា ក្នុងឆ្នាំ២០២២ មានអ្នកដំណើរចំនួន ២ ៣៨២ ០០០នាក់បានធ្វើដំណើរចេញចូលប្រទេសកម្ពុជា ដែលមានកំណើនជិត ៩០០ភាគរយ បើធៀបនឹងឆ្នាំ២០២១។
របាយការណ៍ដដែលឱ្យដឹងថាចំនួនអ្នកដំណើរចេញចូលនេះបើគិតជាចំនួនជើងយន្តហោះមានចំនួន ២៨ ៩០០ជើងមានការកើនឡើង ២៦០% បើធៀបទៅនឹងឆ្នាំ២០២១៕